ازاى تجيب تقدير فى الكلية ؟

إزيكم يا تجاريين طبعا أغلب الناس اللي بتدخل تجاره بيبقوا داخلينها بسبب المجموع ومحدش بيبقي عايز يدخلها ولا حاببها ، وده بسبب إن مجتمعنا حاططها ضمن الكليات الوحشه اللي أي حد ممكن يدخلها عادي طيب علي إفتراض انك كنت شاطر في ثانوي او مش شاطر ودخلتها بسبب ظروف شخصيه عندك او بسبب قله المذاكره ، هل كده خلاص هتتخرج وتقعد علي القهوة زي الناس اللي اتحكالك عنهم؟ الاجابه في إيدك إنت والله ممكن تدخل تجاره بس مع شويه مذاكرة حلوين واجتهاد تتنقل ناقله تانيه في حياتك ، ممكن تبقي ( دكتور جامعي ) طب ازاي نوصل لكده؟ بص ، اولا علشان توصل للمرحله دي لازم الاول تبقي معيد طب إزاي أبقي معيد؟ يعني تبقي الاول او التاني بالكتير علي دفعتك طب ازاي ابقي الاول او التاني علي دفعتي؟ يعني لازم تجيب تقدير عام في الاربع سنين امتياز او جيدجدا وازااااي اجيبهم؟ هقولك .. - اول حاجه لازم وانت داخل الكليه جديد تصاحب ناس شاطره ومجتهده علشان الصحاب ممكن يدمروك وانت مش حاسس ( المرء علي دين خليله ) - تاني حاجه احضر محاضراتك كامله وبلاش تعتمد علي حد من زمايلك يديلك المحاضره بعدين لإن الدكتور وهو بيشرح بيركز علي حاجات معينه وبتفهم من أسلوب شرحه هو عايز اسلوب اجابتك تبقي عامله ازاي في الامتحان - تالت حاجه لما تروح البيت ذاكر اللي خدته في يومها او اليوم اللي بعده بالكتير علشان المعلومه تثبت وطبق عملي بإيدك - رابع حاجه ، وانت بتذاكر ذاكر ماده نظري وبعدها ماده عملي علشان مخك مايقفلش منك - خامس حاجه ماتحفظش حاجه وافهم علشان تريح نفسك لو فهمت المواد النظري كويس ممكن تكتب فيها أكتر ما الدكتور عايز منك بكتييير اوي - سادس حاجه ، الناس العلمي الرياضه سهله خالص بس ذاكروها أول بأول وماتقولوش سهله وهذاكرها قبل الامتحان بيوم ، لأ ، هتنسي حاجات ومش هتعرف تحل - قبل ده كله خلي علاقتك بربنا كويسه دايما ( أذكر ربك في الرخاء يذكرك في الشده ) - لو لقيت حد محتاج منك تشرحله حاجه اشرحله صدقتي ده مش تضييع وقت ده هيثبتلك المعلومه أكتر وهتستفاد - قسم وقتك كويس جدا بين نومك ومذاكرتك ووقت فراغك

الحاجات اللي فوق دي امشي عليها وهتجيب تقدير عالي إن شاء الله وهتبقي متفوق وحتي لو ماشتغلتش دكتور جامعي هتلاقي لنفسك وظيفه في مكان تاني كويس اوي خد بالك ان المرحله دي هتحدد مستقبلك